शासकीय वैद्यकीय महाविद्यालय, गडचिरोली येथे प्रथम वर्षाच्या विद्यार्थ्यांचा " व्हाईट कोट समारंभ"

शासकीय वैद्यकीय महाविद्यालय, गडचिरोली येथे प्रथम वर्षाच्या विद्यार्थ्यांचा " व्हाईट कोट समारंभ" उत्साहात आणि शिस्तबद्ध वातावरणात पार पडला. या सोहळ्याला महाविद्यालयाचे अधिष्ठाता डॉ. अविनाश टेकाडे, उप अधिष्ठाता डॉ. निर्मल सर, तसेच Anatomy विभागाच्या प्रमुख डॉ. हेमलता अंबाडे, बायोकॅमिस्ट्री विभागाचे HOD डॉ. नरेंद्र डांगे, आणि फिजिओलॉजी विभागाचे HOD डॉ. नितीन ढोकणे प्रमुख पाहुणे म्हणून उपस्थित होते. समारंभाची सुरुवात मान्यवरांच्या उपस्थितीत दीपप्रज्वलनाने झाली. त्यानंतर शिक्षकांनी विद्यार्थ्यांना वैद्यकीय व्यवसायातील जबाबदाऱ्या, संवेदनशीलता आणि मानवी मूल्ये जपण्याचे महत्त्व अधोरेखित केले. विशेषतः डीन डॉ. टेकाडे सरांनी आपल्या भाषणात विद्यार्थ्यांनी ज्ञानाबरोबरच करुणा, सेवा आणि प्रामाणिकता ही मूल्ये जपण्याची गरज स्पष्ट केली. त्यांनी गडचिरोलीसारख्या जिल्ह्यात वैद्यकीय सेवा देण्याचे महत्वही प्रतिपादन केले. विद्यार्थ्यांच्या वतीने काही विद्यार्थ्यांनीही मनोगत व्यक्त केले, ज्यातून या प्रवासाची सुरुवात करताना त्यांच्या भावना, अपेक्षा आणि सेवाभाव झळकून दिसला. यानंतर मान्यवरांनी प्रत्येक विद्यार्थ्यास शुभेच्छापूर्वक व्हाईट कोट प्रदान केला. हा क्षण विद्यार्थ्यांसाठी अत्यंत अभिमानाचा आणि भावनिक ठरला. वैद्यकीय शिक्षणाच्या पवित्र प्रवासाची अधिकृत सुरुवात या विधीने झाली. सोहळ्याचा शेवट ‘चरक शपथ’ घालून झाला. विद्यार्थ्यांनी वैद्यकीय व्यवसायाशी निगडित निष्ठा, नैतिकता आणि मानवी सेवा करण्याची प्रतिज्ञा घेतली. गडचिरोलीमधील नव्याने स्थापन झालेल्या सरकारी वैद्यकीय महाविद्यालयाच्या पहिल्या बॅचचा हा सोहळा असल्याने विद्यार्थ्यांमध्ये आणि पालकांमध्ये विशेष उत्साह पाहायला मिळाला. महाविद्यालय प्रशासनाने कार्यक्रम यशस्वीरीत्या पार पाडल्याबद्दल सर्वांचे आभार मानले.